वैष्णवी हगवणे आत्महत्या प्रकरण: रोहिणी खडसेंची महिला आयोगावर 'वराती मागून घोडा' म्हणत टीका

पुण्यातील राष्ट्रवादी काँग्रेसचे माजी पदाधिकारी राजेंद्र हगवणे यांच्या सूनबाई वैष्णवी हगवणे यांच्या आत्महत्येप्रकरणी राष्ट्रवादी काँग्रेस शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी राज्य महिला आयोगावर जोरदार टीका केली आहे. वैष्णवीला सासरच्या मंडळींकडून होणाऱ्या मानसिक आणि शारीरिक त्रासाला कंटाळून आत्महत्या करावी लागली. या पार्श्वभूमीवर महिला आयोगाच्या भूमिकेवर रोहिणी खडसे यांनी प्रश्नचिन्ह उपस्थित केले आहे.###या प्रकरणी महिला आयोगाच्या अध्यक्षा रुपाली चाकणकर यांनी प्रतिक्रिया देताना चौकशीचे आदेश दिले आहेत. मात्र, खडसे यांनी यावर नाराजी व्यक्त करत, महिला आयोगाचा कारभार 'वराती मागून घोडा' असा असल्याची टीका केली. सत्तेतील लोकांकडून आरोपीला वाचवण्याचा प्रयत्न होत असल्याचा आरोपही त्यांनी केला. त्यामुळेच अद्याप आरोपींना अटक झालेली नाही, असा दावाही त्यांनी केला. अजित पवार गटाचे नेते सुनील तटकरे यांनी हगवणेंना पक्षातून निलंबित का केले नाही, असा सवालही त्यांनी उपस्थित केला. तसेच, चित्रा वाघ या प्रकरणी गप्प का आहेत, असा प्रश्नही त्यांनी विचारला आहे.###दरम्यान, वैष्णवी हगवणे यांच्या आत्महत्येप्रकरणी पोलिसांनी पती शशांक हगवणे, सासू लता हगवणे आणि नणंद करिश्मा हगवणे यांना अटक केली आहे. तर, सासरे राजेंद्र हगवणे आणि दीर सुशील हगवणे फरार असून पोलीस त्यांचा शोध घेत आहेत. हुंड्यासाठी शारीरिक आणि मानसिक छळ केल्यामुळे वैष्णवीने आत्महत्या केल्याचा आरोप तिच्या कुटुंबियांनी केला आहे. शवविच्छेदन अहवालात वैष्णवीच्या शरीरावर मारहाणीच्या जखमा आढळल्या आहेत. या घटनेमुळे राजकीय वर्तुळात खळबळ उडाली आहे.