राष्ट्रवादी काँग्रेस पक्ष आगामी स्थानिक स्वराज्य संस्थांच्या निवडणुकांसाठी म्हणजेच 'मिनी विधानसभे'साठी तयारीला लागला आहे. उपमुख्यमंत्री अजित पवार यांच्या नेतृत्वाखाली पक्ष निवडणुकीच्या कामाला लागला असून, गुरुवारी (22 मे) साताऱ्यात एका मोठ्या मेळाव्याचे आयोजन करण्यात आले आहे. त्यापूर्वी, राष्ट्रवादीचे प्रदेशाध्यक्ष सुनील तटकरे आणि महिला आघाडीच्या प्रदेशाध्यक्षा रूपाली चाकणकर यांनी कराडमध्ये दिवंगत यशवंतराव चव्हाण यांच्या स्मृतिस्थळी भेट देऊन अभिवादन केले. यानंतर ते निवडणुकीचे रणशिंग फुंकणार आहेत.
सातारा जिल्ह्यातील पदाधिकारी आणि कार्यकर्त्यांचा मेळावा गुरुवारी आयोजित करण्यात आला आहे. यासाठी सुनील तटकरे आणि रूपाली चाकणकर बुधवारी रात्रीच कराडला पोहोचले. सकाळी यशवंतराव चव्हाण यांच्या स्मृतिस्थळाला भेट दिल्यानंतर, ते विरंगुळा निवासस्थानी भेट देणार आहेत. त्यानंतर सकाळी 10 वाजता साताऱ्यातील पोवई नाक्यावर असलेल्या राष्ट्रवादी काँग्रेसच्या कार्यालयात पदाधिकारी आणि कार्यकर्त्यांच्या मेळाव्यात मार्गदर्शन करतील. या दौऱ्यामुळे राजकीय वर्तुळात मोठी उत्सुकता आहे.
राज्याचे मदत व पुनर्वसन मंत्री मकरंद पाटील, राज्यसभा खासदार नितीन पाटील, आमदार सचिन पाटील आणि राष्ट्रवादीचे सातारा जिल्हाध्यक्ष बाळासाहेब सोळस्कर यांच्या मार्गदर्शनाखाली हा मेळावा आयोजित करण्यात आला आहे. स्थानिक स्वराज्य संस्थांच्या निवडणुकांसाठी राष्ट्रवादी काँग्रेसने सर्वप्रथम तयारी सुरू केल्याचे दिसत आहे. दिवंगत यशवंतराव चव्हाण यांचे कराडमधील स्मृतिस्थळ हे राष्ट्रवादी काँग्रेससाठी नेहमीच प्रेरणास्थान राहिले आहे. अजित पवार यांनी महायुतीत सहभागी झाल्यानंतर याच ठिकाणी येऊन अभिवादन केले होते, तर शरद पवार यांनीही याच स्मृतिस्थळावरून आपल्या महाराष्ट्र दौऱ्याची सुरुवात केली होती.