नागपूरच्या डॉ. बाबासाहेब आंबेडकर आंतरराष्ट्रीय विमानतळावर बंदुकीच्या जिवंत काडतुशांची तस्करी करण्याचा प्रयत्न सुरक्षायंत्रणांनी नाकाम केला. २२ एप्रिल रोजी पहाटे ५.४० वाजता, इरफान खान (४०) नामक आरोपी इंडिगोच्या ६ ई ५००२ क्रमांकाच्या विमानाने मुंबईला जाणार होता. त्याच्या सामानाची तपासणी सुरू असताना, सीआयएसएफच्या उपनिरीक्षक पवन कुमार भीमाशंकर उपाध्याय यांनी स्कॅनिंग मशीनवर तपासणी दरम्यान लाल रंगाच्या बॅगमधून बंदुकीच्या काडतुससदृश वस्तू दिसल्याने बॅग वेगळी केली.
सखोल तपासणीदरम्यान, शेविंग किटमध्ये एक काडतूस आणि इरफानच्या लोअर पॅंटमध्ये एक काडतूस सापडले. तातडीने सुरक्षारक्षकांनी इरफानला ताब्यात घेतले. इरफानकडे बंदूक किंवा काडतूस बाळगण्याचा कुठलाही परवाना नव्हता. पोलिसांनी त्याला अटक करून सोनेगाव पोलीस ठाण्यात गुन्हा दाखल केला.
इरफान हा वाहने विक्रीचे काम करतो आणि मुंबईहून वाहने आणून नागपुरात विक्री करतो. त्याने दावा केला की, दोन्ही काडतुसे एका मित्राच्या फार्महाऊसवर सापडली होती. सध्या त्याला एका दिवसाची पोलीस कोठडी मिळाली असून, सविस्तर चौकशी सुरू आहे.