मावळ तालुक्यातील नवलाख उंबरे गावात मंगळवारी सकाळी मधमाश्यांच्या हल्ल्यात माजी उपसरपंच हनुमंत बबुशा कोयते (वय ४४) यांचा मृत्यू झाला असून तीन जण जखमी झाले आहेत. जखमी झालेल्यांमध्ये दत्ता कडलक, लक्ष्मण कदम आणि एकनाथ धायबर यांचा समावेश आहे. ही घटना गावातील राम कडा परिसरात घडली आहे.
पोलिस निरीक्षक रणजित जाधव यांनी दिलेल्या माहितीनुसार, चार तरुण मॉर्निंग वॉकसाठी नवलाख डोंगरावर गेले असता तेथील मधमाश्यांनी हल्ला केला. यात दोन जण पळून सुटले तर हनुमंत कोयते आणि एक अन्य व्यक्ती यांना मधमाश्यांनी जोरदार हल्ला केला. गंभीर जखमी झालेल्या कोयते यांना सोमाटणे फाटा येथील रुग्णालयात दाखल केले असता त्यांचा मृत्यू झाला.
तळेगाव एमआयडीसी पोलिस स्टेशनमध्ये या घटनेबाबत अकस्मात मृत्यूची नोंद करण्यात आली आहे. पोलिस उपनिरीक्षक बाळासाहेब जगदाळे यांच्या नेतृत्वाखाली या घटनेचा तपास सुरू आहे. डोंगराळ भागात मधमाश्यांचे हल्ले वाढत असल्याचे या घटनेने पुन्हा एकदा उघड झाले आहे.